==قالوا البنات..==

احنا البنات اللى مات خطابها فى الجبهه

والعقد فرفط مننا ملحقناهوش

ابنك يا مصر اللى مات معرفناهوش

والعقد فرفط مننا بالااااااااااااااااااه

لمينا خرز الدموع

وعملنا سبحة صلاه

اورنيك ذنب

بين ائتلاف الضاد
و امتداد الدال
شرطة طويلة..
شايلة فوقها جتتك
و لإنك القلب الوحيد..
اللي ملكش في النكت
عداك طابور الضحك
اورنيك ذنب
لساك بتدفع فيه
لحد ما يسهلها ربك
بين ائتلاف الضاد
و امتداد الدال
الباب بيفتح..
تلقى غيره الف باب
الشعر شاب
مع انه ما عداش
مراحل سكتك..
من غرقتك ..
تندار و ترجع للبداية
فتبص من شباك ..
معانق سلك شايك
بتلاقي طير ..
عامل كده ..؟
تنده عليه ..
فيمد ايده..
و لإنك انت ..
عضو بارز..
جوا نادي الضد
الطير جناحه ينكسر
وتفرد دمعة من عنيه..
ويقول يا ريتني ..
بين ائتلاف الضاد
و امتداد الدال
بتحاول إنك تنتصر
علي جيش مغّيب
عن عنيك
فبتنهزم ..
وبتنعزم
علي نوع معين من عصير ال..
فبتشربه ..
في الساعة دي بالذات00
بتضحك
مع انك00
مضحوك عليك

حرب باردة

ف سنة 2011

أمريكا هتدخل ف قلوبنا

وهتحتل الناصية

اللي ماحدش يقدر غيرها

يخش عليها

وهتعتبر الناصية دهية

موقع نت

واحنا كمان

هنسلم خالص خالص

علشان نقدر نسمع كل اتصالاتها

ونحاول نستمتع بحروبها

مع الناس التانية

اياً كانوا

ف سنة 2011

هيكون عدي تلات سنوات

علي حاجة هايفه جداً

اسمها هيمنة

الناس كانت مرعوبة

وحاسه انها مش حرة

والقمح كمان

كان بيتنطط م الفرحة

علشان شايف الناس زعلانة

امريكا

مش بتحب الناس المرعوبة

ف سنة

2011

تيجي نغير جلدنا

هسميكي عصفورة
وسميني عندليب
يمكن تكون الصورة غير الصورة
ويبقي فرجه قريب
هنسيب عيوننا للقمر ونطير
ونزقزق الروح ع الشجر
مناقير
ونلّقط الخوف م البشر والنوح
ونغني غنوة ماهدهاش الحرف
لسه بتولد ف الكلام وتبوح
ياغنوة ساعة المخاض
وجعك...بداية انطلاقة
جلدك بينشع فوارس
تفتح من الحلم
طاقة
النور هييجي الصبح بدري
ويسهي قلب الضلمة
بحبوب الجراءة
هسميكي عصفورة
ف ارسمي ف وشك
براءة
وسيبيني اغني
لثورة ما انتهاش الحلم فيها
يمكن ف يوم يسمعني
سرب
ينتبه ليها
ياغنوة هتعدي الحدود امتي ؟؟
الدنيا عتمة والحلم ف الشنطة
مقفول عليه بليل الخوف
ويبشرونا بالنهار
يطلع "أونطة"